Dövlət Komitəsinin elektron sənəd dövriyyəsi myGov platformasına inteqrasiya olunub

“Azərbaycanın yeni rəqəmsal arxitekturası” adlı vahid fəaliyyət planına həsr olunmuş
müşavirədə Prezident İlham Əliyevin dövlət xidmətlərinin “myGov” elektron hökumət
portalı üzərindən həyata keçirilməsi ilə bağlı verdiyi tapşırığa uyğun olaraq, Qaçqınların
və Məcburi Köçkünlərin İşləri üzrə Dövlət Komitəsi də məqsədyönlü iş aparır. Nəticədə
məmur-vətəndaş təması aradan qaldırılır, şəffaflıq mühiti yaradılır.
Dövlət Komitəsi ölkə rəhbərinin tələblərini yerinə yetirərək, vətəndaşların müraciətlərinə
həssaslıq göstərir, müasir texnoloji yeniliklərdən istifadə etməklə bu sahədə işin daha
da təkmilləşdirilməsi istiqamətində tədbirlər həyata keçirir.
Belə tədbirlərdən biri komitənin daxili elektron sənəd dövriyyəsi sistemi (ESD) ilə myGov
platforması arasında inteqrasiyanın başa çatdırılmasıdır. Bu ilin aprel ayından tətbiqinə
başlanan yeni elektron xidmət vətəndaşların vaxtına, komitənin isə resurslarına qənaət
olunmasına şərait yaradır.
Qeyd edək ki, indiyədək ərizə, müraciət, təkliflərlə bağlı vətəndaşlar poçt, elektron
resurslar ( elektron poçt, Dövlət Komitəsinin rəsmi facebook və instagram hesablarının
mesaj bölməsi), yaxud müvəqqəti qeydiyyatda olduqları rayonlar üzrə komitənin
nümayəndəlikləri vasitəsi ilə komitəyə müraciət edirdilər. “MyGov” platformasına
inteqrasiya vətəndaşlara, heç bir yerə getmədən, internet üzərindən müraciət etmək və
cavab almaq imkanı verir. Bunun üçün “myGov” portalında şəxsi kabinetə 5 üsuldan
birini seçməklə ( “İdentifikasiya nömrəsi ilə”, “SİMA Rəqəmsal İmza”, “SİMA Token
(Elektron İmza)”, “ASAN İmza”, “Elektron İmza”, “BSXM – Elektron İmza”) daxil olmaq
mümkündür.
Bu xidmətlərdən istifadə ilə bağlı “myGov” portalında yerləşdirilmiş təlimat videosunda
məlumat ala bilərsiniz.
Portala daxil olduqdan sonra Ana səhifədə yerləşən müraciət bölməsindən “Dövlət
qurumlarına müraciət” seçilir. Açılan bölmədə “Müraciət et” düyməsi klik edilir. Dövlət
qurumlarının siyahısından Qaçqınların və Məcburi Köçkünlərin İşləri üzrə Dövlət
Komitəsi seçilir, “müraciətin tipi” - ərizə, şikayət, təklif, sorğu - müəyyənləşdirilir. Daha
sonra müraciət mətni daxil edilir. Müraciətə əlavə edilməsi istənilən digər sənədlərin
zəruri bölməyə yükləndikdən sonra “Davam et” düyməsi seçilir. Bu zaman vətəndaşın
fərdi elektron poçt ünvanı və əlaqə nömrəsi qeyd edilir.
Müraciət birbaşa komitənin daxili ESD sisteminə daxil olur, burada qeydiyyata alınaraq
aidiyyəti struktur bölmələr üzrə icraya yönləndirilir. Müraciətlərə baxıldıqdan sonra
hazırlanmış cavablar isə sistem üzərindən yenidən vətəndaşın “myGov”
platformasındakı şəxsi kabinetinə göndərilir. Beləliklə, vətəndaş müraciətinin qəbulu,
icrası və cavablandırılması üzrə vahid, çevik və şəffaf elektron mübadilə mexanizmi
formalaşdırılmış olur.
Sözügedən inteqrasiya “Böyük Qayıdış” Proqramının məqsədləri baxımından da xüsusi
əhəmiyyət daşıyır. Belə ki, azad edilmiş ərazilərə qayıdan və qayıdış prosesinə cəlb
olunan vətəndaşların dövlət xidmətlərinə operativ çıxışının təmin olunması, onların
müraciətlərinin çevik və sistemli qaydada qəbul edilməsi, sosial və inzibati məsələlərin
elektron qaydada daha rahat həll olunması, ümumilikdə qayıdış və uyğunlaşma
prosesinin daha səmərəli təşkili baxımından bu inteqrasiya praktiki əhəmiyyətə malikdir.

Bu yanaşma dövlət-vətəndaş münasibətlərinin müasir rəqəmsal platformalar üzərindən
qurulmasını gücləndirməklə “Böyük Qayıdış” Proqramının icrasına da əlavə dəstək
verir.

shushainfo.com