Kətə

Tərkibi:
Un - 3 kq
Maya - 100 q
Kərə yağı - 650 q
Şəkər tozu - 700 q
Yumurta - 15 ədəd
Vanil - 5 q
Duz - 5 q
Su - 800 ml

İçlik üçün:
Kərə yağı - 1200 q
Şəkər kirşanı - 900 q
Vanil - 5 q
Un - 2 kq

Hazırlanması:
Xəmir opara üsulu ilə hazırlanır. 35-40°C-dək qızdırılmış suya (ümumi miqdarın 60-70%-i) hazırlanmış maya, un (ümumi miqdarın 35-60%-i) əlavə olunur, qarışdırılır və yetişməsi üçün 1-1,5 saat kənarda saxlanılır. Xəmir 2-2,5 dəfə böyüdükdə ərinmiş yağ və qalan maya kütləsinə həll olunmuş şəkər tozu, yumurta, vanil, duz əlavə olunur. Xəmiri bərabər struktur alınana qədər yoğururlar. Hazır xəmiri 250 q porsiyalara formalaşdırır, onları qalınlığı 5-6 mm olan dairəvi yastı kökə şəklinə salır, ortasına içlik qoyur, kənarlarını birləşdirirlər. Hazırlanmış kökələri təkrarən qalınlığı 15-20 mm olan dairəvi yastı formaya salır, üzərinə yumurta çəkir, çəngəl ilə deşərək şəkil çəkir, yağlanmış tavalara yerləşdirir və 20-30 dəq 200-220°C-də bişirirlər.
İçlik üçün: 10°C-dək soyudulmuş yağı rafinə olunmuş şəkər kirşanı və vanil ilə yoğurur, sonra yavaş-yavaş una əlavə edərək qarışdırırlar.

Mənbə: Qarabağ Mətbəxinin İnciləri ( Tahir Əmiraslanov, Aynurə Əmiraslanova, Ceyran Əsgərova, Gülnar Ələsgərova, Ehtiram Fərzəlibəyov )